Læringsmål

Formålet med emnet er å kvalifisere for ulike typer kulturformidling blant barn og unge i norsk kulturliv. Ein vil søkje å realisere dette formålet ved at studentane

· tileignar seg innsikt i og utviklar ei sjølvstendig haldning til ulike mål, rammer og oppgåver for kulturformidling blant barn og unge.

· tileignar seg kunnskap om kulturelle og sosiale prosessar knytt til barn og ungdom, og evne til å nytte kunnskapen i konkrete døme på praktisk kulturformidling.

· utviklar kompetanse til å gjennomføre og vurdere ulike typar kulturformidling blant barn og unge

Innhold

Å vurdere og formidle kulturuttrykk: Oppleving og tolking av ulike kulturuttrykk for og av barn og unge. Drøfting av kvalitetsomgrepet med utgangspunkt i konkrete døme på kulturuttrykk i undervisning, arrangement og andre formidlingsformer blant barn og unge.

Barne- og ungdomskultur: Ein tek føre seg barn og unge som målgruppe og ser på den historiske utviklinga av barne- og ungdomsrolla. Generell innføring i einskilde sosialiserings- og utviklingspsykologiske teoriar. Ein tek opp barn og unge si stilling i familien og i samfunnet, oppvekstmiljø og tilvære for barn og ungdom, fritidsmønster, livsstil, leik og deltaking i kulturelle aktivitetar m.m. Aktuelle tema som t.d. media, rus, vold, det fleirkulturelle samfunnet, vil bli drøfta i samanheng med teoriar om samfunnsmessige tilhøve.

Offentleg barne- og ungdomspolitikk: Overordna mål, rammer og oppgåver for kulturformidling blant barn og unge i kommunalt, fylkeskommunalt og statleg kulturliv. Oversikt over kulturtiltak som rettar seg mot barn og ungdom, både i regi av det offentlege og av dei friviljuge barne- og ungdomsorganisasjonane.

Kulturformidling blant barn og unge: Tema knytt til kulturformidlaren si rolle i praktisk arbeid med barn og unge. Studenten skal sjølv medvirke til å knytte teoretiske kunnskapar til praktiske døme (t.d. kulturarrangement og –undervisning for barn og unge, kulturprosjekt som involverer barn og unge, fritidstiltak blant barn og unge). Undervisninga tar utgangspunkt i konkrete døme på kulturformidling som det er skrive om i pensumlitteraturen eller vitja på fagturar.

Organisering

Forelesingar og seminar over to semester, fagturar, framleggingar av skriftleg arbeid for godkjenning og munnlege øvingar.
Obligatorisk deltaking på alle fagturar. Delar av undervisninga er obligatorisk. Dette blir det opplyst om ved starten av kurset. Ved manglande frammøte må studenten skrive ein rapport som tek føre seg det aktuelle emnet.

Vurderingsformer

Obligatorisk skriftleg undervegsprøve som tel 40 % av samla karakter. Skriftleg individuell 5-timars sluttprøve som tel 60 %. Graderte karakterar. Studenten må ha ståkarakter i begge prøvene for å få karakter i emnet.

Det tas forbehold om mindre justeringer i planen.