Læringsutbytte

Studenten skal gjennom studiet :

• Designe og framstille klede som er individuelt tilpassa kroppen og i å designe mindre kolleksjonar.
• Designe og framstille klede med utgangspunkt i gjenbruksmateriale (re-design) og lære seg å sy om klede
• Tileigne seg kunnskap om drakt – og motehistorie, både bymote og folkedrakter, for å kunne bruke dette i utvikling av eigne produkt
• Orientere seg om dagens motebilde – og designuttrykk, for å sette eigne arbeid inn i ein større samanheng
• Arbeide sjølvstendig og reflektert med dei ulike delemna i studiet

Etter fullført studium skal studenten kunne:

• dokumentere kunnskap og ferdigheter i idéutvikling og designprosessar gjennom eige arbeid
• dokumentere kunnskap og ferdigheter i ulike teknikkar det vert undervist i på studiet
• nyttigjere seg av kunnskapen som ligg i dei ulike tema i studiet, slik at teknikk og estetisk refleksjon og vurdering blir viktige faktorar i formgjevingsprosessen
• formidle eigne og andre sine arbeid gjennom utstillingar og presentasjonar

Innhold

Innhald, oppbygging og samansetning

Innhaldet i studiet er delt inn i 5 delemne som samla sett gjev ulike perspektiv på temaet design, re -design og saum av klede.

Det vil vere fokus på målsydde og handverksproduserte klede. Studiet inneheld praktisk arbeid med ulike materialar og bruk av maskiner, reiskap og teknikkar i saumfaget. Studentane skal lære måltaking, mønsterkonstruksjon, mønsterforming, tilskjering, tilpassing av plagg og ulike saumteknikkar, re-design og omsaum, modellering mm.

• Idéutvikling og designprosess 20%
• Saumteknikk og tilskjering 27%
• Mønsterkonstruksjon 27%
• Re-design, omsaum og modellering 20%
• Fagteori 6%

(Vektinga seier noko om omfanget i dei ulike emna og kva som vert mest vektlagt i studiet)

Delemne 1 Idéutvikling og designprosess

Mål

Studentane skal lære seg metodar for å utvikle eigne idéar fram til ferdige produkt

Tema

• Korleis hente inspirasjon
• Idéutvikling
• Designprosess
• Skissering / moteteikning / flateteikning
• Utforming av kolleksjon

Delemne 2 – Saumteknikk og tilskjering

Mål

Studentane skal lære seg ulike tilskjerings - og saumteknikkar for framstilling av klede; for heile plagg, fór og for detaljar i plagget.

Tema

• Maskin- og handsaumteknikkar
• Saumtekniske detaljar
• Tilskjering
• Stryking og pressing
• Symaskin og overlockmaskin
• Fóring

Delemne 3 –Mønsterkonstruksjon

Mål

Studenten skal lære seg grunnleggande mønsterkonstruksjon, mønsterforming og tilpassing på kropp

Tema

• Mønsterkonstruksjon
• Måltaking og tilpassing etter mål
• Utarbeiding av lerretsmodellar og tilpassing på kropp
• Modelleringsteknikk på byste
• Prøving, tilpassing og innretting

Delemne 4 – Re-design, omsaum og modellering

Mål

Med utgangspunkt i brukte tekstilar skal studenten utforme nye klede

Tema

• Analyse av form, materialkvalitet og stiluttrykk i brukte tekstilar
• Re-design og omsaum
• Modellering med gjenbruksmateriale på byste og kropp
• Kombinasjon av modellering og mønsterkonstruksjon i gjenbruksmateriale
• Saumteknikk for re-design og omsaum

Delemne 5 - Fagteori

Mål

Fagteorien skal belyse ulike tema i studiet og gje studentane eit grunnlag for å kunne arbeide reflektert og sjølvstendig gjennom studiet.

Tema

• Mote- og drakthistorie, bymote og folkedrakter
• Materiallære
• Estetikk- og designteori
• Presentasjon/utstilling
• FoU-metodikk

Studiet er sett saman og organisert i 7 heile vekesamlingar, frå måndag – til fredag, 3 i haustsemesteret og 4 i vårsemesteret. Dei to siste samlingane er sett av til arbeidet med eksamenoppgåva, individuell rettleiing og arbeid med utstilling og presentasjon av eksamensoppgåve /catwalk.

Det er obligatorisk deltaking på undervisninga under samlingane. Undervisning som vert gjeve under samlingane skal gje studentane nødvendig kunnskap for å kunne fylgje progresjonen i studiet.

Dei ulike emna er integrert i kvarandre. Fagteori og design vil vere gjennomgåande tema under samlingane, då dette set det praktiske arbeidet inn i eit større perspektiv og vil vere ei hjelp for studentane i deira val av estetiske og tekniske løysingar.

Arbeids- og læringsformer

Undervisninga er organisert i form av forelesingar, gruppearbeid, seminar, individuell rettleiing og sjølvstudium. Studiet krev aktiv deltaking frå studentane si side, og den enkelte har ansvar for å fylgje opp framdrifta i studiet. Mellom samlingane skal studentane arbeide med heimeoppgåver som er utforma på bakgrunn av det som det har vore undervist i på samlinga og som skal førebu til neste samling. Arbeidet mellom samlingane er svært viktig, då det er her studentane får repetert og brukt kunnskapen dei har fått, på ein sjølvstendig og problemløysande måte.

Studentane vil ha tilgang til rettleiing mellom samlingane.

Vurderingsformer

Det skal vere samsvar mellom mål, innhald, arbeidsformer og vurdering i studiet. Vurderinga vert ein viktig del av studiet og vil skje i form av tilbakemeldingar på korleis studenten har løyst oppgåvene mellom samlingane og i tilbakemeldingar / drøftingar under samlingane.

Vurderingskriterier

Vurderingskriteriene vil variere i forhold til kva som vert vektlagt i dei forskjellige oppgåvene. Dette vert spesifisert i oppgåvetekstene. Samla sett for studiet vil dess kriteria vere aktuelle:

• Bruk av tekniske verkemiddel i forhold til materialval, funksjon og motiv
• Tekniske ferdigheiter
• Bruk av estetiske verkemiddel og evne til å framstille heilskaplege produkt
• Sjølvstende og refleksjon i forhold til eige skapande arbeid
• Studenten sin evne og vilje til kreativ tenking
• Evne til å utvikle idear og omsetje ideane i ferdige produkt
• Evne til systematisk fagleg arbeid og dokumentasjon / presentajon

Arbeidskrav

For å få vitnemål må studenten ha gjennomført og fått godkjent arbeidskrava som studiet krev:

• 4 heimeoppgåver, ei oppgåve etter kvar av dei fire første samlingane må vere levert inn til fastsett frist og godkjent. Oppgåvene er utforma slik at studentane skal kunne arbeide sjølvstendig med faglege problemstillingar som skal hjelpe dei til å nå målsetjinga for studiet. For at studenten skal kunne gå i gang med den avsluttande oppgåva, må alle 4 heimeoppgåver vere godkjende.
• Den avsluttande oppgåva skal vere eit sjølvstendig FoU-arbeid. FoU-arbeidet skal innehalde element frå alle hovudemna i studiet og skal dokumentere kunnskap i desse emna. Studenten skal ha fått godkjent prosjektskisser som skal danne grunnlag for arbeidet med den avsluttande oppgåva. Dette er eit krav som skal sikre at studenten vel ei oppgåve som er i tråd med målet for studiet.

Avsluttande oppgåve skal presenterast / stillast ut under avslutningsdagane ved instituttet.

• Godkjent obligatorisk frammøte på undervisning, minimum 80 % deltaking

Eksamen

Alle arbeidskrava er del av eksamen. Vektinga i forhold til karakter:

• 4 heimeoppgåver: Vurdert til godkjent / ikkje godkjent
• Obligatorisk deltaking: Vurdert til godkjent / ikkje godkjent

• Avsluttande oppgåve: Tel 100 % av samla karakter for studiet.

Det vert gjeve ein karakter for studiet, basert på avsluttande oppgåve. Karakterskalaen er gradert frå A til F, der A er høgaste karakter og E er lågaste ståkarakter.

Ein viser elles til forskrift om eksamen ved Høgskolen i Telemark.

Med atterhald om mindre endringar i planen

Det tas forbehold om mindre justeringer i planen.