Læringsutbytte

Etter fullført emne skal studentane ha følgjande læringsutbytte i form av kunnskap, ferdigheiter og generell kompetanse:

* generell kompetanse i ferskvassøkologi som grunnlag for forvaltning og bruk av våre ferskvassressursar

* kunnskap om viktige komponentar i vatnet sitt krinslaup

* kunnskap om viktige fysiske, kjemiske og biologiske prosessar i overflatevatn

* kjennskap til viktige miljøproblem knytta til ferskvatn

* kunne tolke limnologiske data og kjenne til prinsippa for typifisering av vassforekomstar og fastsetting av økologisk status

* kjennskap til standard metodar for vassprøvetaking og vassanalysar

* kunne ta vassprøver i innsjøar og elver

* kunne artbestemme viktige planter (makrovegetasjon og planteplankton) og dyr (dyreplankton og botndyr) som lever i ferskvatn

* kunne skrive ein limnologisk feltrapport

Innhold

Ferskvassøkologi er eit tverrfagleg emne med samfunnsretta tema integrert. Sentrale tema i forelesingar og øvingar er: nedbørfeltet og aktivitetar i nedbørfeltet, innsjødanning, vass- og sedimentkjemi, stoffomsetjing, viktige plante- og dyregrupper, forurensningskjelder og helsekonsekvensar av forureining, forsuring og kalking, metall- og organiske forureiningar, eutrofiering og restaurering, klimaeffektar på ferskvatn, tolking av ferskvassøkologiske data på bakgrunn av EU sitt rammedirektiv for vatn og klassifiseringssystem for vasskvalitet.

Arbeids- og læringsformer

Undervisinga vert gitt i form av forelesing, seminar og feltkurs. Det viktigaste innhaldet i forelesingane er tilgjengeleg for studentane i elektronisk form. Til kvart tema er det laga repetisjonsspørsmål slik at studentane kan jobbe vidare på eiga hand med dette.

Studentane får utlevert ei obligatorisk gruppeoppgåve med fysiske/kjemiske data frå ulike vassforekomstar som skal tolkast og vurderast.

I emnet inngår ein obligatorisk dag med feltprøvetaking frå is samt ei obligatorisk felt- og laboratorieveke på våren.

Vurderingsformer

Det vert gitt karakter A - F på tre delar: Grupperapport frå feltkurs tel 20%, tolkingsoppgave 20% (gruppearbeid) og individuell 5 timar skriftleg slutteksamen som tel 60%. Alle delar må vere bestått for å få sluttkarakter i emnet.

Det tas forbehold om mindre justeringer i planen.