Læringsutbytte

Målet er at studentane skal kunne anvende relevante humanistiske, samfunnsvitskaplege og kulturøkonomiske fagperspektiv på det kulturpoliske feltet. Ein legg særleg vekt på internasjonalt samanliknande problemstillingar.

Innhold

I dette emnet vil ein studere kulturpolitikk og kulturøkonomi i eit internasjonalt perspektiv. Ein fokuserer særleg på organiseringa av/økonomien til det profesjonelle kunstfeltet, men det er òg aktuelt å sjå nærare på andre delar av kulturområdet (massemedium, kulturindustri, folkekultur). Ein studerer korleis kulturlivet er organisert og finansiert i ulike land – og korleis allmenne internasjonaliseringstendensar slår inn i kulturlivet. Ein kombinerer kultursosiologiske, estetiske og kulturøkonomiske fagperspektiv. Følgjande tema er aktuelle:
- Teoriar om det kulturpolitiske og kulturøkonomiske feltet
- Internasjonalisering og globalisering
- Kulturpolitiske modellar; kulturpolitisk organisering og finansiering i ulike land
- Statleg kulturpolitikk i ulike land
- Regional og lokal kulturpolitikk i ulike land
- Internasjonale organisasjonar og kulturpolitikk
- Internasjonalt kultursamarbeid
- Kultur og økonomi allment. Omgrep og teoretisk rammeverk
- Kulturens økonomiske verdi.
- Kulturøkonomi og kulturpolitikk
- Kulturinstitusjonane sin økonomi – i Noreg og andre land
- Kunstnarane sine arbeidsmarknader og levekår – i Noreg og andre land
- Kulturindustri og kulturøkonomi

Arbeids- og læringsformer

Undervisningsforma i eit fordjupingsemne er seminar, med 3 timar per veke. Seminarforma føreset aktiv deltaking frå studentane i form av førebudde innlegg og deltaking i diskusjonen. Undervisninga går i vårsemesteret.

Vurderingsformer

Sluttvurdering av fordjupingsemnet skjer ved prøveforelesing på 40 - 45 minutt eller ved munnleg eksamen. Kandidatane bestemmer sjølve om dei vil prøveforelese eller ha munnleg eksamen, men dei skal prøveforelese i det eine fordjupingsemnet og ha munnleg eksamen i det andre. Oppgåva til prøveforelesinga blir oppgitt av instituttet. Kandidatane melder frå ved oppmeldinga til det einskilde emnet kva for evalueringsform dei ønskjer.

Det tas forbehold om mindre justeringer i planen.