Innledning

Norskfaget handlar om identitet, kultur, danning og tilhøvet vårt til samtid og fortid. Gjennom ulike teoretiske tilnærmingar til faget og eit breitt spekter av arbeidsmåtar, vil studenten få ei grundigare forståing for samanhengen mellom fag, fagdidaktikk og praksis.

I Norsk 2 skal studenten få utvida forskingsbasert innsikt i norsk språk, tekstkunnskap og fagdidaktikk. Det historiske perspektivet på norskfaget og det norske språket vil bli særleg framheva. Studenten vil få innblikk i korleis det norske språket har endra seg gjennom tidene, og slektsskapet til dei andre nordiske språka. Studiet vil og gje forskingsbasert innføring i teoriar om lesing og skriving, særleg retta mot den andre lese- og skriveopplæringa.

Ein annan viktig del av studieprogrammet er nordisk barne- og ungdomslitteratur. Studiet vil innehalde ei komparativ tilnærming til ulike nordiske barnelitterære tekstar, både skriftlege og samansette. Studenten vil få rettleiing og undervisning i arbeid med litterær analyse, tolkingsteori og litteraturdidaktikk.

Kunnskap om retorikk og munnleg arbeid i klasserommet står og sentralt i norskfaget. Retorikken inneheld omgrep til å skape og vurdere munnlege tekstar, samtidig som den gjev oss verkty til å analysere både læreboktekstar, skjønnlitterære tekstar og samansette tekstuttrykk.

Norsk 2-studiet skal byggje på forskingsbasert kunnskap, samtidig som vi stiller krav til studenten om å skrive oppgåver etter vitskapsteoretiske og metodiske prinsipp.

Målgruppe og opptakskrav

Lærare som ynskjer vidareutdanning i norsk språk og litteratur. Norsk 2 byggjer på Norsk 1 eller tilsvarande.

Mål for studieprogrammet

Målet for studieprogrammet er å styrkje kompetansen i norsk muntleg og skriftleg, og gje studenten ei grundigare forståing for samanhengen mellom fag, fagdidaktikk og praksis.

Læringsutbytte

- kunnskap om språklege endringsprosessar i fortid og samtid

- kunnskap om nordisk barne- og ungdomslitteraturforsking

- kunnskap om tekstteori, og didaktisk teori knytt til den andre lese- og skriveopplæringa

- kunnskap om retorikk som tolkingsverkty, og som teoretisk grunnlag for utvikling av munnleg kompetanse

Studieprogrammets innhold, oppbygging og sammensetning

Norsk 2 - Glu 1-7, EVU (etter- og videreutdanning) er eit nettbasert årsstudium som består av to modular tilsvarande 30 studiepoeng: Litteratur og språklege emne i nordisk perspektiv (NORVU 103), og Lese- og skriveopplæring og samansette tekstar i nordisk perspektiv (NORVU 104).

Arbeids- og læringsformer

Studenten må reikna med ein arbeidsressurs tilsvarande ein halv arbeidsdag pr. uke.

Det pensumrelaterte fagstoffet vil leggjast ut som undervisningsvideoar og andre digitale læringsressursar på nettet. Arbeids- og læringsformer vil basere seg både på individuelt arbeid med stoffet og lærarstyrt seminar på nettet, dessutan og på studentstyrt gruppearbeid med rettleiing av faglærar.

Forholdet mellom teori/praksis

Kvar enkelt student vil få rettleiing av faglærar, bl.a. i form av praksisrelaterte samtalar på nettet. Innleveringsoppgåvene vil vere praksisretta, og dei norskfaglege emna i seminar og gruppearbeid vil vere relevante for skolearbeidet på eigen arbeidsplass.

Vurderingsformer

Du vil som student møte to former for vurdering i studiet - undervegsvurdering og sluttvurdering. Undervegsvurderinga i modul 1 består av ei skriftleg innlevering på nynorsk. Sluttvurderinga etter modul 103 vil vere ein individuell skriftleg eksamen, valfri målform. Undervegsvurderinga i modul 2 vil vere ei skriftleg innlevering på bokmål, og eit munnleg framlegg på nettet. Sluttvurdering etter modul 104 er ei skriftleg heimeoppgåve i språkleg eller litterær fordjuping, valfri målform, og ein individuell munnleg eksamen på nettet. Sjå elles nærare presisering i emneplanen for dei enkelte modulane.

Det tas forbehold om mindre justeringer i planen.