Læringsmål

Studenten skal utvikle ei heilskapleg forståing av kulturvernet sin plass i samfunnet og kunne gjere greie for politikk og organisering på kulturvernfeltet. Studenten skal kjenne dei sentrale kulturvernområda og samanhengar mellom materiell og immateriell kultur. I tillegg skal studenten ha kunnskap om formidling innafor området og vite kva rolle kulturvernet har i andre sektorar, innan regional utvikling og planlegging, innan reiseliv og turisme.

Innhold

Fordjupingsemnet er sett saman av:

Tilhøvet mellom immaterielt og materielt kulturvern
Offentleg kulturvern
Museum, arkiv og kulturminnevern
Det friviljuge kulturvernarbeidet
Formidling på kulturvernfeltet
Lovverk og forvaltning
Kulturvernet si rolle på ulike nivå i samfunnet
Historisk framvekst, utvikling og etikk
Legitimering og forståingsmåtar
Offentlege styringsdokument og rammer for kulturvernfeltet

Organisering

Forelesingar og seminar over to semester, fagturar, framleggingar av skriftleg arbeid og munnlege øvingar.

Det er krav om 80% deltaking på timeplanlagde seminar/prosjekt. Ved meir enn 20% fråver vert det halde ei munnleg prøve i pensum. Obligatorisk deltaking på alle felles fagturar for heile årskullet. Ved manglande deltaking må studenten skrive ein rapport som tek føre seg det faglege innhaldet for turen. Det er ikkje eit krav at studentane skal vere til stades ved all undervisning. Ein rår likevel til at undervisninga blir følgt regelfast.

Vurderingsformer

Obligatorisk skriftleg oppgåve som tel 40 % av samla karakter. Skriftleg individuell 5-timars eksamen som tel 60 %. Graderte karakterar. Både oppgåve og slutteksamen må vere bestått for å få bestått karakter i emnet.

Det tas forbehold om mindre justeringer i planen.