Læringsmål

Emnet gjev praktisk og teoretisk innsikt i reportasjefotografering som teknikk og formidlingsform. Studentane skal gjennom semesteret utvikle evner til å fortelje levande historier gjennom fotografiet, og presentere forteljinga i den journalistiske reportasjeforma. Emnet gjev teoretisk kunnskap som grunnlag og tryggleik i det praktiske arbeidet, og gjennom respons på konkrete arbeid stimulere den visuelle formidlingsevna til studenten. Emnet passar for studentar som er interesserte i å fortelje historier gjennom bilete, og som ønskjer å utvikle desse forteljarevnene.

Innhold

Emnet gjev ei grunnleggande praktisk og teoretisk innføring i reportasjefotografering. Det praktiske arbeidet vil utgjere hovuddelen av studiet. Studentane skal gjennom undervisning, praktiske oppgåver og rettleiing/respons få auka kompetanse om reportasjefotografering. Gjennom praksisen skal studentane opparbeide seg ei grundig forståing av kva reportasjefotografering handlar om. Sentrale tema er idéutvikling, observasjon som metode, kjeldearbeid og kjeldekritikk. Gjennom praktisk arbeid med fotografering skal studentane få ei grunnleggande forståing om kva fotoreportasjen går ut på, og m.a. lære seg grunnleggande digital kamerateknikk, forteljarteknikkar gjennom bilete, fotografering i felt, val av motiv, kroppsspråk, lyssetting, perspektiv, komposisjon og biletbehandling.

Praksisen skal byggje på innføringar i biletteori som skal gje rikare innsikt i journalistisk verksemd når studentane praktiserer reportasjefotografiet i konkrete studentarbeid.

Teoriundervisninga inkluderer presseetikk og kjeldekritikk. Studentane skal også utvikle eit skarpare blikk på det visuelle innhaldet i journalistikken. Kjennskap til ulike analysestrategiar og auka forståing for mediert kommunikasjon skal gje innsikt i og forståing for kva som pregar pressa sin meiningsproduksjon og røyndomsbilete, og gjere studentane tryggare i sin eigen formidlingspraksis gjennom semesteret.

Organisering

Undervisninga vil bli gjeven gjennom førelesingar og seminar. Utover i semesteret vil undervisninga i aukande mon gå føre seg i grupper med praktisk opplæring i fototeknikk og komposisjon. Studentane skal gjennomføre praktiske oppgåver, og får respons på dei etter kvart, i grupper og plenum.

Ved semesterstart får studentane ei praktisk oppgåve for å få ei forståing av kva reportasjefotografering handlar om, og få ei litt breiare erfaring med feltet før ein periode med undervisning som legg vekt på fototeknikk. Etter perioden med teoriundervisning vil undervisninga fokusere på det praktiske arbeidet. Her blir det lagt opp til verkstadundervisning der studentane arbeider med eigne bilete i gruppesamarbeid.

Undervisninga skal vere todelt, med ein del som gjev studentane innføring i problemstillingar knytte til reportasjefotografiet og praksis, og ein produksjonsorientert del, der studentane skal utvikle eigne bilete fram mot eigne fotoreportasjar. Etter kvar innlevering får studentane merknader frå lærer og/eller medstudentar i seminargrupper.

Det er obligatorisk for studentane å vere til stades på førelesingane, gjennomføre alle øvingar som inngår i studiet, og delta aktivt på seminar. Studentane må rekne med stor eigeninnsats og aktiv deltaking i undervisninga.

Vurderingsformer

Gjennom semesteret skal studentane levere ei mappe med arbeid. Arbeidsomfanget skal normalt liggje på fire innleveringar gjennom semesteret. Føremålet med mappevurderingane er å stø opp under ein læringsprosess der studentane skal få jamn og relevant trening i og tilbakemelding om det faglege innhaldet dei skal prøvast i på slutteksamenen, og der ein samstundes kan få ei oppfatning om den faglege progresjonen for den enkelte gjennom semesteret.

Mappeinnleveringane blir kontinuerleg vurderte av faglærar, med sluttvurderinga greidd/ikkje greidd. Alle oppgåver som krevst til mappa skal leverast innan oppsette fristar. Studentane har i alt tre freistnader på å få ei innlevering vurdert som greidd.

Føresetnaden for å kunne gå opp til slutteksamenen er at mappeinnleveringa er vurdert til greidd-resultat.

Slutteksamenen er ein praktisk heimeeksamen som går over fem dagar, der kandidatane skal prøvast i fotoreportasjearbeid. Ved vurdering blir det nytta bokstavkarakterar frå A til F, med E som lågaste greidd-karakter.

Det tas forbehold om mindre justeringer i planen.