Læringsmål

I dette andre fordjupingsåret i folkekunst skal studentane vidareutvikle ferdigheitene sine i å formgje i eit materiale. Ein bør kunne meistre eit materiale på ein slik måte at ein kan kombinere teknikkar og estetisk kompetanse for å nå sine mål uttrykt i form av ein gjenstand. Studentane skal arbeide med teoretiske problemstillingar innan design/formgjeving i sitt materiale og prøve ut desse i konkrete oppgåver. Studentane skal erfare gjennom idéutvikling og arbeid i eit materiale korleis bevisst arbeid med formale grunnprinsipp påverkar og bestemmer ein gjenstand.

Gjennom studiet skal studentane:

• Auke sin kunnskap om materialet og materialet sine kvalitetar og eigenskapar
• Arbeide med problemstillingar knytt til vidareføring av tradisjonskunst og omformulering i nye uttrykk
• Arbeide med formproblematikk knytt til spesielle tekniske utfordringar og løysingar
• Få auka kunnskap og trening i å utvikle eigne idear fram til realiserte produkt
• Arbeide sjølvstendig og reflektert i forhold til eigne val og løysingar
• Ta sikte på å kome fram til eit klart og personleg uttrykk i si formgjeving

Innhold

Studentane skal få høve til å fordjupe seg innan sine fagfelt (tre- metall eller tekstil), både teoretisk og praktisk.

Delemne 1:Materiale, form og teknikk (20 studiepoeng)

Gjenstanden er eit resultat av materiale, form og teknikk og utøvaren sin fortrulegheits – og ferdigheitskunnskap i høve til å beherske desse faktorane. Studenten skal få innføring i tradisjonelle teknikkar og på bakgrunn av dette arbeide vidare med eigne eksperiment og studiar i formale grunnprinsipp og i ulike materialkvalitetar. Ein skal også arbeide med teknikkar som det har vore undervist i tidlegare år, men då med eit siktemål om å utforske teknikken vidare, kanskje til andre føremål og med problemstillingar innan det formalestetiske feltet.

• Studenten skal tilegne seg kunnskap i nye teknikkar
• Studenten skal utforske tilhøvet mellom form, materiale og teknikkar med utgangspunkt i problemstillingar som vert presenterte
• Studenten skal arbeide etter ein eksperimenterande metode for å kome fram til nye løysingar
• Studenten skal reflektere og vurdere formalestetiske utfordringar og løysingar som gjeld vidareføring av tradisjon i nye gjenstandar

Delemne 2: Fagteori (5 studiepoeng)

Teoretisk kunnskap og innsikt skal auke studentane si forståing og evne til å analysere og reflektere kring tradisjon og estetiske problemstillingar og uttrykk. Ein bygger vidare på teori frå dei to tidlegare studieåra. Studentane skal få eit grunnlag for å kunne vurdere eigne uttrykk i ein notidig samanheng og bli medvitne om estetiske verkemiddel i den materielle tradisjonskunsten og i andre kunstnarlege uttrykk. Fagteorien vil omhandle både generelle kunstteoretiske uttrykk og meir fagspesifikk teori knytt til tradisjonar innan dei ulike materialområda.

• Studenten skal sette seg inn i fagteori som er knytt til den praktiske undervisninga
• Studenten skal få innsyn i ulike kunstnarlege uttrykk i vår tid og sette desse inn i ein større samanheng
• Studenten skal kunne analysere og vurdere gjenstandar og kunstnarlege uttrykk

Delemne 3: Forskingsmetodikk og FoU-arbeid ( 5 studiepoeng)

Forskingsmetodikken skal hjelpe studentane til å gjere riktige val i dei ulike studieoppgåvene, både i forhold til praktiske- og teoretiske problemstillingar. Det er eit mål at studentane vert i stand til å arbeide systematisk for på den måten å tileigne seg ny kunnskap. I dette delemnet skal studentane utforme eit prospekt for arbeidet med fordjupingsoppgåva som dei skal arbeide med i vårsemesteret.

• Studenten skal kunne avgrense studiefeltet sitt, utforme problemstillingar, bruke kjeldemateriale, presentere og vurdere resultat av arbeidet sitt.

• Studenten skal få kunnskap om ulike metodar for innhenting av datamateriale og på bakgrunn av dette velje hensiktsmessige metodar i sitt studium der kombinasjonen av praktiske og teoretiske tilnærmingar vil vere sentrale
• Studenten skal utforme eit prospekt som dannar grunnlaget for eit større arbeid, fordjupingsoppgåve.

Organisering

Arbeids- og undervisningsformene i studiet er forelesingar, seminar, gruppearbeid, ekskursjonar og sjølvstudium. Undervisninga i haustsemesteret er lagt til faste vekedagarr og intensive bolkar i tilknytning til oppstart og innføring av nye tema.

Vurderingsformer

Haustsemester, 30 studiepoeng

Arbeidskrav som må vere gjennomførte for å få vitnemål:

1 studieoppgåve vurdert til bestått / ikkje ikkje bestått i delemne 1

2 studieoppgåver vurdert med karakter i delemne 1

1 skriftleg prøve, 4 timar i fagteori

Det vart ført ein karakter på vitnemålet.

Studieoppgåver med karakter tel 75 % av samla karakter

Skrifteg prøve i fagteori tel 25 % av samla karakter

( A-E er bestått karakter, F er ikkje bestått)

Det tas forbehold om mindre justeringer i planen.