Målgruppe og opptakskrav

Studiet rettar seg mot alle som ønskjer ei utdanning som kvalifiserer for stillingar innan revisjon, rekneskapsarbeid og økonomi og administrasjon i privat og offentleg verksemd. Opptakskrav til studiet er generell studiekompetanse eller realkompetanse.

Mål for studieprogrammet

Revisjonsstudiet skal gi studentane ei teoretisk og yrkesretta utdanning. Det vil seie at studentane skal opparbeide fagleg innsikt, analytiske evner og problemforståing innan økonomiske, sosiale og politiske system og prosessar. Det vil bli gitt innføring i økonomisk politikk og samfunnsøkonomisk planlegging og bakgrunnen for regulering av verksemd i næringslivet. Studenten skal lære seg prinsipp for leiing og organisasjon, kvalitetsstyring og kommunikasjon. Det vil vidare bli gjennomgått etiske problemstillingar, etiske tradisjonar, normer og verdiar i det moderne samfunnet. Det vil og bli lagt vekt på utvikling av nødvendige sosiale ferdighetar til bruk i arbeidsgruppe og prosjekt og utvikling av god skriftleg og munnleg kommunikasjon.

Konkret vil dette innebere at studiet skal gi studentane:

• ei teoretisk utdanning som gjer dei kvalifiserte til det arbeidet som er tillagt ein registrert revisor
• ei teoretisk utdanning som kvalifiserer for arbeid med rekneskaps- og revisjonsoppgåver innan privat og offentleg sektor
• eit grunnlag for vidare studium til mastergrad i revisjon (statsautorisert revisor) eller annan mastergrad

Viktigaste oppgåva til ein registrert revisor er å utføre revisjon for å stadfeste årsrekneskapen til verksemda (Revisors melding). For å klare dette nyttar han mellom anna ymse verkemiddel som til dømes gjennomgang av dei interne kontrollrutinane for sal, kjøp, lønn, varelager og stikkprøvekontroll av rekneskapsbilag. Det er og viktig å kontrollere at årsrekneskapen er i samsvar med rekneskapslova og skattelova. Krava som er sette til ein revisor og det arbeidet han gjer, finn ein dels i lover om revisjonsplikt, dels i administrative føresegner og dels følgjer dei av revisjonsteori og grunnsetningar for god revisjonspraksis. I tillegg kjem ei rekkje andre oppgåver som det er naturleg å løyse for ein registrert revisor, til dømes rådgiving for bedriftsleiinga når det gjeld rekneskapsføring, skatte- og avgiftsspørsmål, rekneskapsanalyse og ulike konsulentoppdrag for andre enn revisorkundar og liknande.

Revisorstudiet kvalifiserer og for andre stillingar innanfor området for økonomi- og administrasjon i verksemder og innanfor offentleg sektor. Grunnlaget for det er at studiet gir ei god innføring i:

• føring av rekneskap
• utarbeiding av årsrekneskap
• analyse og forståing av årsrekneskap
• skatteregler for næringsverksemd
• organisasjonsstrukturar og -utvikling og personalhandsaming
• administrative rutinar og endring av slike rutinar
• økonomiske kalkulasjonar og utrekningar i samband med interne avgjerder

Videre studiemuligheter

Fullført studium med karakteren C eller betre på dei 4 offentlege revisoreksamenane, gir grunnlag for opptak til masterstudiar i revisjon og rekneskap.

Studieprogrammets innhold, oppbygging og sammensetning

Rammeplan for treårig Bachelorstudium i revisjonsfag er ein nasjonal rammeplan fastsett av Undervisnings- og forskingsdepartementet. For å bli registrert revisor, må ein, etter fullført studium oppfylle visse karakterkrav (tilleggskrav frå Kredittilsynet), ha minimum 3 års variert revisjonspraksis og stått på ei praktisk prøve etter avslutta praksisperiode.

Studiet er 3-årig og gir 180 studiepoeng. Studiet gir tittelen Bachelor i revisjon. Studiet tilfredstiller både nasjonale og internasjonale krav til fagleg innhald på bachelornivå.

Studiet er delt opp i emne som til vanleg varer 1 til 2 semester med 3-8 undervisningstimar for veka. Kvart emne gir studiepoeng som svarar til den arbeidsmengda emnet krev. Heile studiet er på 180 studiepoeng fordelt med 30 studiepoeng på kvart semester.

Det blir tatt atterhald om endringar i studieplanen.

Arbeids- og læringsformer

Det vil bli nytta varierte arbeids- og undervisningsformer i emna som inngår i studieplanen, til dømes forelesingar, emne/seminar, gruppeoppgåver, individuelle oppgåver og eksamenar. Tradisjonelle forelesingsformer kan bli supplerte med aktiv bruk av e-post, internett og databasert modellverkty.

Vurderingsformer

Kandidatanes kunnskapar innanfor alle emne i studiet skal evaluerast. Det vil bli nytta varierte evalueringsformer. Aktuelle evalueringsformer går fram av emneomtalene. Det blir nytta graderte karakterar (A-F med F som ikkje bestått). For å få vitnemål (graden Bachelor) i revisjon må ein oppfylle kravet til å bli registrert revisor. Det vil seie at ein må ha fullørt studiet etter gjeldande studieplan og ha greidd karakteren C eller betre i Skatterett, Rettslære, Revisjon og Årsrekneskap/god rekneskapsskikk. Kandidatar som ikkje klarar karakterkrava, kan få tittelen Bachelor i økonomi og administrasjon.

Det tas forbehold om mindre justeringer i planen.